Rusia është vendi i radhës që do të përfshihet në opracionin e evakuimit të refugjatëve në Afganistan. Katër avionë ushtarakë do të marrin me vete 500 qytetarë.
Disa ditë më parë, Rusia ishte e hapur të bashkëpunonte me talebanët, por derisa të shihnin se si ata vepronin në qeveri.
Kujtojmë se talebanët nuk kanë rënë dakord për një marrëveshje në shtyerjen e afatit të evakuimit nga Afganistani. Kjo është dhe një arsye pse vendet e tjera po bëhen bashkë dhe po mundohen të arrijnë një evakuim të lartë refugjatësh deri në afatin e përcaktuar.
Putin ndërkohë kërkoi që grupet ekstremiste islamiste të mos përhapeshin nga Afganistani në Azinë Qëndrore dhe më tej pasi përbënin kërcënim për rajonin.
Zëdhënësi i talebanëve, Zabihullah Mujahid ka reaguar duke u bërë thirrje shteteve që të mos inkurajojnë njerëzit afganë të largohen nga atdheu i tyre. Ai gjithashtu shtoi se jeta po kthehet në normalitet në vend por ndërkohë kaosi në aeroport mbetet ende një problem. Shumë afganë janë të dëshpëruar për t’u larguar nga vend i cili është marrë nën kontroll nga talebanët.
Po ashtu Rusia ka kritikuar tërheqjen e trupave amerikane nga Afganistani që shkaktoi dhe kaosin e menjëhershëm. Duket se Rusia po punon me disa standarde, por pritet të shihet nëse do të rreshtohet krah SHBA apo talebanëve në rastin e Afganistanit.
