Shtimi i rasteve të reja me koronavirus ka shkaktuar panik dhe frikë tek qytetarët.
Përpos grupmoshave të ndryshme covidi nuk ka lënë pas pa infektuar edhe gratë shtatzëna të cilat rrezikojnë të kenë pasoja më të rënda nëse infektohen me virusin e rrezikshëm, pasi një pjesë e madhe prej tyre janë të pavaksinuara.
Drejtori i Klinikës Gjinekologjike e Obstetrike, Jakup Ismajli ka bërë të ditur se është rritur numri i grave shtatzëna të infektuara me coronavirus, ndërsa theksoi se tashmë rekomandohet që edhe gratë shtatzëna të vaksinohen.
Ismajli në një deklaratë për Telegrafin ka thënë se deri të martën në mesditë 25 gra shtatzëna janë së shtrira në repartin për COVID-19 në Klinikën e Gjinekologjisë, teksa 10 nga to po trajtohen me oksigjeno-terapi, e dy janë në gjendje më të rëndë.
“Kemi bërë disa herë apel që shtatzënat rekomandohet të vaksinohen, duke pasur parasysh që komplikimet janë shumë më të mëdha nga kjo sëmundje. Të gjitha shtatzënat përveç mbajtjes së distancës e masave tjera, e vetmja masë parandaluese në përhapjen e kësaj sëmundje është vaksinimi. Prandaj, unë rekomandoj që të gjitha shtatzënat të vaksinohen”, tha Ismaili.
Ndryshe, javën e fundit është rritur dukshëm numri i grave shtatzëna të infektuara me COVID-19 që po trajtohen në Klinikën Gjinekologjike e Obstetrike në QKUK dhe asnjëra nga to nuk është vaksinuar kundër coronavirusit.
“Nga këto 25 shtatzëna 10 janë në oksigjeno-terapi, ndërkaq dy të tjera janë pak më të prekura. Jemi në konsultim me pulmologun, anesteziologun, infektologun, kështu që janë në monitorim permanent nga ana e profesionistëve”, tha Ismaili.
Ai bëri të ditur që asnjëra nga shtatzënat që janë të infektuara me COVID-19, të shtrira në Klinikën që ai drejton, nuk ka marrë asnjërën nga dozat e vaksinës anti-COVID.
