Presideni i Francës, Emmanuel Macron, është treguar i hapur sa i përket iniciativës “Ballkani i Hapur”, një nismë mes Ramës, Vuçiç dhe Zaev. “GazetaExpress” shkruan se burime diplomatike kanë bërë me dije se kur flitet për avancimin e bashkëpunimit rajonal, Franca mbështet synimet e tregut të përbashkët në kuadër të Procesit të Berlinit dhe potencojnë se nisma “Open Balkan”, ofron një mundësi të mirëpritur.
Francezët gjithashtu theksojnë se duhet bërë përparim në kuadër të Procesit të Berlinit, teksa afrohet Samiti i radhës Bashkim Evropian-Ballkan Perëndimor, që do të mbahet më 6 tetor.
“Ne mbështesim fuqizimin e bashkëpunimit rajonal në Ballkanin Perëndimor, që është jetik për zhvillimin ekonomiko-social dhe për lidhje me të ngushta me Evropën. Ky bashkëpunim është vendosur për të përfshirë gjashtë vendet në rajon dhe të vazhdohet në standardet dhe parimet evropiane.
Për shembull, ne mbështesim synimin e tregut të përbashkët rajonal të shpallur në Samitin e Sofjes në kuadër të Procesit të Berlinit (10 nëntor 2020). Në këtë kontekst, iniciativa Open Balkan e nisur më 29 korrik 2021 nga Serbia, Shqipëria dhe Maqedonia e Veriut ofron një mundësi të mirëpritur për të bërë përparim në këtë drejtim, me kusht që të jetë e koordinuar me punën në vazhdim e sipër në kuadër të Procesit të Berlinit, punë e cila duhet të avancojë në prag të Samitit të ardhshëm të Bashkimit Evropian-Ballkani Perëndimor”, ishte reagimi i qeverisë franceze.
