Katër shqiptarë të Kosovës janë evakuuar nga Afganistani.
Lajmin e ka bërë të ditur Ministria e Punëve të Jashtme dhe Diasporës e cila ka reaguar me një postim në rrjetin e saj social në facebook ku ka thënë se kanë qenë në kontakt të drejtpërdrejtë me katër personat e bllokuar në Afganistan dhe ju është ofruar ndihma e duhur për të bërë të mundur evakuuimin e tyre.
Në njoftimin për mediat, thuhet se si pasojë e përshkallëzimit të situatës në Afganistan, janë identifikuar dhe ndihmuar shtetasit e Kosovës, në mënyrë që të mos i rrezikohej jeta.
“MPJD-ja vazhdon ta mbaj të hapur linjën emergjente me numër +383 45 492 316, dhe është në dispozicion tu ofroj ndihmë të gjitha rasteve të reja që eventualisht mund të lajmërohen në periudhën në vijim”, thuhet në komunikatën e MPJ-së.
Sakaq presidentja e Kosovës, Vjosa Osmani, në një intervistë për BBC ka thënë se Kosova mirëpret afganët, ndërsa ka përmendur faktin se edhe ajo ka qenë refugjate dhe se e ndjen këtë situatë.
Numri i saktë i afganëve që do të vijnë në Kosovë ende nuk dihet, ndërsa presidentja Osmani tha se kjo ende do të diskutohet.
“Me shumë gjasë ne do t’i kemi ata më shpejt se që e presim. Në fillim menduam se ata do të vinin për disa javë dhe se mund të kemi më shumë kohë për t’u përgatitur…. brenda tri ditëve do të merret vesh edhe për datën e saktë se kur do të vijnë ata”.
