Një zjarr ka përfshirë mbrëmjen e sotme fshatin Lapardha 2 në Berat. Flakët të favorizuara edhe nga era janë përhapur me shpejtësi. Mësohet se nga zjarri janë djegur disa ha me shkurre, ferra dhe pemë frutore. Fatmirësisht forcat zjarrfikëse kanë mbërritur menjëherë, pas njoftimit të marrë nga banorët e zonës, duke bërë të mundur lokalizimin dhe fikjen e flakëve që po i afroheshin banesave.
Banorët e zonës deklarojnë se zjarri ka qenë i qëllimshëm, ndërsa në rrezik nga zjarri ishin rreth 10 shtëpi të fshatit Lapardha 2, të cilat ndodheshin jo më shumë se 50 metër nga vatra e zjarrit.
“Zjarri nuk merr vetë, e ka vënë dikush. Po ta kisha gjetur këtu do ta hidhja nga zjarr”-, është shprehur një nga banorët për mediat, të cilit iu rrezikua banesa.
Mësohet se në vendin e ngjarjes kanë mbërritur edhe forcat e policisë, që po punojnë për identifikimin dhe kapjen e autorëve të kësaj zjarrvënie të qëllimshme.
Po ashtu një zjarr masiv është ndezur mbrëmjen e sotme edhe në Peqin. Mësohet se zjarri ka rënë midis zonës së Njësisë Administrative Shezë dhe bashkisë Belsh. Zjarri ka marrë përmasa të mëdha, ndërkohë që rrezikohen dhjetëra banesa. Për shkak të terrenit të vështirë është e pamundur ndërhyrja nga toka
