Mbrëmjen e sotme kanë mbërritur në aeroportin e Rinasit 45 630 doza të vaksinës Pfizer, duke e çuar numrin e vaksinave të ardhura në Shqipëri në më shumë se 1.8 milionë.
Kryeministri Edi Rama e ka ndarë lajmin në rrjetet sociale, teksa i bën thirrje qytetarëve që të shfrytëzojnë ditët e mbetura të muajit gusht për t’u vaksinuar ndaj Covid-19.
“45,630 doza të vaksinës Pfizer sapo kanë mbërritur në Aeroportin ‘Nënë Tereza’ duke e çuar në mbi 1,8 milion numrin e vaksinave të mbërritura në Shqipëri.
1,270,057 vaksinime janë kryer deri tani, por duhet ende të rritet mbulesa vaksinale, ndaj një thirrje për qytetarët që ende nuk janë vaksinuar të shfrytëzojnë ditët e mbetura të muajit gusht për t’u vaksinuar ndaj COVID-19.
#VaksinatShpëtojnëJetë
#ShqipëriaBuzëqesh”, shkruan kryeministri Edi Rama.
Kujtojmë se muaji gusht do të jetë muaj i hapur vaksinimi për të gjithë qytetarët +18 vjeç. Kushdo mund të paraqitet në pikën më të afërt të vaksinimit apo në qendrën shëndetësore për t’u vaksinuar ndaj Covid-19.
Ndërkohë, ditën e sotme në vendin tonë janë raportuar 69 raste të reja pozitive me koronavirus dhe është shënuar një humbje jete. Javët e fundit rastet e infektimeve në vendin tonë kanë ardhur në rritje, për shkak edhe të pranisë së variantit Delta.
