Ministria e Mbrojtjes ka dhënë informacion zyrtar në lidhje me situatën e zjarreve në vendin tonë. Sipas ministrisë, disa vatra zjarri janë ende problematike, pavarësisht punës së pandërprera që po bëjnë forcat zjarrfikëse.
Bëhet me dije se vazhdojnë të jenë aktive vatrat e zjarrit në fshatin Dukat i Ri dhe në Gadishullin e Karaburunit e cila paraqitet e rrezikshme pasi po përhapet në drejtim të Llogarasë. Gjithashtu situata paraqitet kritike edhe në Majën e Rrunës, mbi tunelin e Kalimashit ku po punohet për të mbajtur nën kontroll flakët pasi kërcënojnë zonat e banuara. “Vijon të jetë aktive vatra e zjarrit në fshatin Dukat i Ri, në Gadishullin e Karaburunit, e cila paraqitet rrezikshmëri, pasi ka përhapje në drejtim të Parkut Kombetar të Llogarasë. Prej orëve të para të mëngjesit ka rinisur operacioni edhe nga ajri.
Vatra tjetër kritike është ajo në Majën e Rrunës, mbi tunelin e Kalimashit, ku ka vijuar puna për mbajtjen nën kontroll, në mënyrë që flakët të mos kërcënojnë banesat.
Në fshatin Thirrë në Fan të Mirditës zjarri nuk paraqet rrezik për banesa, ndërsa po vijon puna për shuarjen e tij. Zjarri në fshatin Munellë-Domgjon është izoluar në njërin krah, por po vijon puna në krahun tjetër, ku ende ka prani flakësh” thuhet ne informacionin e ministrisë.
Situata nuk është aspak e mirë edhe në fshatin Kushovë, i cili i përketë njësisë administrative Voskopojë, ku që prej pasdites së djeshme po punohet për të vënë nën kontroll zjarrin që ka përfshirë një hapësirë të konsiderueshëm pyjore më pisha.
Situatë e vështirë zjarri ka qenë dje, në fshatin Patalej, njësia administrative Kolsh, bashkia Mirditë. Sot vazhdon zjarri në shkurre, ndërsa janë shtuar forcat operacionale.
Në fshatin Corrush në Mallakastër janë izoluar dy vatra, por puna vijon për izolimin e flakëve në tre vatra të tjera aktive, të cilat janë në terren të vështirë.
Në fshatin Bogë, njësia administrative Shkrel është aktivizuar një vatër zjarri mbrëmjen e djeshme. Nuk paraqet rrezik për banesat.
Një vatër zjarri është njoftuar në Parkun e Tomorrit në lartësinë mbi 1500 m, por situata po ndiqet nga forcat vendore.
