Zëvendës ambasdori amerikan në Shqipëri, Demian Smith tha sot se SPAK do të jetë një sukses i plotë me Byronë Kombëtare të Hetimit.
Gjatë fjalës së tij para kandidatëve për drejtues të BKH, Smith tha se BKH do t’i tregojë Shqipërisë se askush nuk është mbi ligjin dhe se ai zbatohet njëlloj për të gjithë. Diçka të tillë e kërkon populli shqiptar, ka thënë ai.
Deklaratat e Smith erdhën një javë pasi ai është emëruar në Shqipëri, në eventin e parë jashtë Ambasadës që ishte aktiviteti për përfundimin e programit të trajnimit të FBI-së nga ky grup.
“Shqipëria ka ngritur tashmë që të dy institucionet që përbëjnë SPAK-un- Prokurorinë e Posaçme dhe BKH-në. Prokuroria e Posaçme ka qenë duke punuar pa ju, por tashmë ju do të bashkoni forcat kundër korrupsionit dhe krimit. Vetëm me BKH-në, me të gjithë ju, SPAK-u do të jetë një sukses i plotë. Qëndroni pjesë e luftës. Partnerët tuaj rreth e rrotull botës mund të hedhin dritë mbi aktorët e këqij, por do të jetë SPAK-u që do të bëjë punën e vështirë: hetimin dhe ndjekjen penale, duke punuar dorë për dorë për të përmbysur korrupsionin dhe krimin e organizuar. Ndërsa dilni nga ky diplomim, ju do të jeni pjesë e një kapitulli të ri të institucioneve të pavarura, të besuara, efikase dhe të besueshme të gjyqësorit.
I sotmi është një hap i rëndësishëm përpara në luftën e Shqipërisë kundër korrupsionit dhe krimit të organizuar. BKH-ja do t’i tregojë Shqipërisë se askush nuk është mbi ligjin dhe se ai zbatohet njësoj për të gjithë. Ditët e pandëshkueshmërisë së të pasurve dhe të fuqishmëve kanë mbaruar. Këtë e kërkon populli shqiptar”, deklaroi Smith.
