Ministrja e Infrastrukturës dhe Energjisë, Belinda Balluku ka njoftuar ditën e sotme se Porti i Durrësit, po ofron ambiente konteinerike dhe vinça për punonjësit që po ndërhyjnë në zonat e zjarreve.
Ministrja me anë të një postimi në rrjetet sociale ka theksuar ndër të tjera se kjo është një ndihmë për emergjencat civile dhe partnerët ndërkombëtarë të angazhuar në vendin tonë.
“Të gjithë bashkë për të përballuar situatën emergjente të zjarreve në vend. Autoriteti Portual Durrës ka vendosur në dispozicion ambiente konteinerike dhe vinça që do t’ju vijnë në ndihmë emergjencave tona civile dhe partnerëve tanë ndërkombëtarë që janë duke ndërhyrë në zonat e përfshira nga zjarret. Së bashku do ja dalim.”, statusi nga Belinda Balluku.
Kujtojmë se vendi ynë prej ditësh është përfshirë nga flakët të cilat “kërcënojnë” që të kalojnë edhe në zonat e banuara. Situata vazhdon të jetë kritike në Karaburun. Po ashtu problematike është situata edhe në zonën e njohur si Maja e Rrunës ku flakët kanë dalë jashtë kontrollit, favorizuar edhe nga erërat e forta të cilat e kanë bërë më të vështir neutralizimin e flakëve. Gjithashtu janë konstatuar edhe disa vatra zjarri në disa zona përkatësisht në Has, Kukës, Tropojë. Aktualisht janë aktive vatrat e zjarrit në Kodër Gështenjë, Betosh, Shëngjergj, dhe Pogaj në njësinë administrative Gjinaj.
