Prej disa ditësh qyteti i Fierit është përballur me një problem të rëndë të djegies së plehrave, që ishte vetëm një ripërsëritje e asaj çfarë ka ndodhur vit pas viti. Por më në fund problem i mbetjeve që digjen prej vitesh në fushën në lagjen Sheq i Madh. Mësohet se tashmë ka nisur edhe transferimi i mbetjeve drejt inceneratorit që do të merret me përpunimin e tyre, duke reduktuar një problem të madh për qytetarët.
Flakët përfunduan një ditë më parë dhe tashmë ka nisur edhe puna për largimin e mbetjeve drejt landfilldit.
Kryetari i Bashkisë së Fierit, Armando Subashi kishte thënë se kjo gjë do të bëhej e mundur pas ndërtimit të rrugës që të çon te inceneratori, duke vendosur afat për këtë gjë, ditën e fundit të muajit gusht.
Për një javë rresht djegia e mbeturinave e vështirësoi aktivitetin dhe jetesën e banorëve në qytetin e Fierit, duke lëshuar tym helmues që u shpërnda kudo. Reja e tymit mund të shihej madje edhe në Patos e në fshatra të Roskovecit. Era e rëndë u përhap në të gjithë qytetin dhe deri dje ndihej në zonën ku ende vazhdonte të dilte tym, derisa flakët u vunë më në fund nën kontroll.
