Policia e Pogradecit ka nisur procedimin penal për mjeken e maternitetit të qytetit, G.Sh., 51 vjeçe. Ajo dyshohet se ka neglizhuar mjekimin e nevojshëm pas lindjes së foshnjës së shtetases D.Y. foshnja e sapolindur u transportua më pas për mjekim të specializuar drejt Tiranës, ku ka ndërruar jetë. Mjekja, banuese në Tushemisht, është marrë tashmë nën hetim nga Specialistët për Hetimin e Krimeve në Komisariatin e Policisë Pogradec.
Ngjarja tragjike ndodhi në datën 31 korrik në Tiranë, ndërsa deri tani nuk është bërë me dije se nga çfarë problem shëndetësor vuante foshnja.
Materialet i kanë kaluar Prokurorisë pranë Gjykatës së Shkallës Pogradec për veprime të mëtejshme hetimore.
Njoftimi i plotë i Policisë së Shtetit:
Pogradec
Specialistët për Hetimin e Krimeve në Komisariatin e Policisë Pogradec, filluan procedimin penal në gjendje të lirë për shtetasen G. Sh., 51 vjeçe, banuese në Tushemisht, Pogradec (me detyrë mjeke në maternitetin e qytetit të Pogradecit).
Kjo shtetase më datë 24.07.2021, dyshohet se ka neglizhuar në trajtimin e nevojshëm mjekësor pas lindjes, të foshnjës së shtetases D. Y., e cila më pas u transportua në Tiranë për mjekim të specializuar ku më datë 31.07.2021, ka ndërruar jetë.
Materialet për hetime të mëtejshme i kaluan Prokurorisë pranë Gjykatës së Shkallës Pogradec.
