Flakët kanë mbuluar kodrat e fshatit Mbolan në Njësinë Administrative Sinjë në Berat gjatë pasdites së sotme.
Mësohet se zjarri është shfaqur rreth dy orë më parë, në fillim në një pjesë kullote e më pas është përhapur me shpejtësi për shkak të erës dhe temperaturave të larta.
Ekipet e zjarrfikëses kanë shkuar në zonë me qëllim shuarjen e flakëve, megjithatë terreni është mjaft i vështirë. Ndërkohë, sipas burimeve nga efektivët e zjarrfikëses, zjarri ka qenë i qëllimshëm, për të hapur kullotat e reja nga ana e banorëve të zonës.
Po ashtu mësohet se zjarri është duke u vënë nën kontroll, ndërsa deri tani rreth tre hektarë me shkurre e dëllinja kanë përfunduar të djegura.
Kujtojmë që zjarret në vendin tonë kanë qenë të shumta gjatë ditëve të fundit për shkak të temperaturave të larta. Situata ka qenë më kritike në qytetin e Fierit, ku flakët kanë pëfshirë fushën e grumbullimit të mbetjeve në Sheq, që prej ditës së martë. Tymi ka mbuluar prej ditësh qytetin dhe e ka bërë të vështirë aktivitetin e përditshëm për shkak edhe të erës së rëndë. Reja e tymit nga fusha e mbetjeve, ka mbërritur madje edhe deri në Patos e fshatrat e Roskovecit.
