Në Greqi, situata e shkaktuar nga varianti Delta është tepër shqetësuese. Autoritetet shëndetësore në Greqi i bëjnë thirrje qytetarëve që të vaksinohen për të parandaluar përhapjen e këtij varianti të ri.
Ka qenë Ministri i Shëndetësisë, Vassillis Kikilias, ai i cili është shprehur se më të rrezikuar janë grupmoshat mbi 55 vjeç, duke i bërë thirrje që të vaksinohen.
Duke u ndalur edhe te sezoni turistik, Kikilias ka thënë se të gjithë duhet të jenë të vaksinuar përpara se të shkojnë në ndonjë vend me pushime. “Armiku më i mirë i virusit është vaksina, prandaj vaksinohuni”, ka thënë fillimisht ministri i shëndetësisë.
Referuar situatës së vështirë në spitalet e vendit, ministri i Shëndetësisë theksoi se personeli shëndetësor i përkushtohet edhe sëmundjeve të tjera.
“Të gjithë duhet të mendojmë se ka bashkëqytetarë që kanë kancer ose sëmundje të rënda”, është shprehur Kikilias, duke ripërsëritur që qytetarët të tregohen vigjilentë dhe të respektojnë masat e anti Covid.
I pyetur në lidhje me variantin “Delta”, ai tha se ka dominuar me rreth 75-80% në të gjithë Greqinë, si dhe me mbi 90% në disa ishuj dhe zona turistike.
“Nëse një qytetar nuk vaksinohet sa më parë të jetë e mundur, rrezikohet shumë nga varianti Delta”, ka përfunduar Kikilias.
