Gjykata e Apelit në Shkodër ka lënë në masën e sigurisë “arrest me burg”, për dy mjekët e Traumës, Serdi Memini dhe Ervin Sulaj si dhe infermieren nga Shkodra, Diellë Macaj.
Dy mjekët janë arrestuar në spitalin e Traumës, pasi dyshohet se i kanë marrë para Fatbardh Dylit, babit të të plagosurit në masakrën e Velipojës, Elmidin Dyli. Mësohet se avokatët mbrojtës Anton Kosteri, Bujar Hoti dhe Landa Marku kërkuan zbutje të masës së sigurisë “arrest me burg” me pretendimin se ndaj dy mjekëve nuk ka asnjë provë. Gjithashtu edhe avokatja e infermieres kërkoi masë më të zbutur.
Prokurorja e apelit Pranvera Gruda kërkoi lënien në fuqi të masës së sigurisë “arrest me burg” dhënë nga gjykata e shkallës së parë në Shkodër duke thënë se vendimi i shkallës së parë është i drejtë. Në fund gjyqtari i Apelit Tonin Sterkaj pasi dëgjoi palët vendosi që të lërë në fuqi masën e sigurisë “arrest me burg” të shkallës së parë duke pranuar kërkesën e prokurorisë së Apelit.
Kujtojmë se seanca nisi që ditën e djeshme por u shty për sot për shkak se prokurorja e apelit kërkoi të njihet më gjatë me aktet e ekspertimit dhe pretendimet e palës mbrojtëse. Avokatët mbrojtës paraqitën një raport vlerësimi të përformancës së mjekëve gjatë punës së tyre si dhe gatishmërinë për lënien e garancisë pasurore, por këto nuk janë marrë parasysh nga gjykata e apelit e cila vendosi të lërë në fuqi masën “arrest me burg”. E vetmja mënyrë tashmë mbetet ose rekursi në gjykatën e lartë nga avokatët mbrojtës ose kërkesë për zëvendësim mase në gjykatën e shkallës së parë në Shkodër.
