Temperaturat e larta janë shfaqur në pjesë të ndryshme të globit. Teksa vendet e Europës Qendrore dhe së fundmi edhe Kina janë përballur me përmbytje, në Dubai kemi të bëjmë me një tjetër faktor të kushteve atmosferike.
Temperaturat e larta kanë bërë që autoritetet në këtë vend, të mendojnë për një alternativë tjetër zgjidhjeje, duke krijuar kështu një shi artificial. Sipas qendrës Kombëtare të Meteorologjisë, reshjet sollën një sasi të madhe të ujit që vërshoi në rrugë.
Të dielën, shërbimi kombëtar i motit i Emirateve të Bashkuara Arabe publikoi pamjet me video të reshjeve të mëdha të shiut.
Shiu stimulohet duke përdorur teknologjinë e dronëve të shumtë, të cilët lëshojnë ngarkesa elektrike në re, në mënyrë që ato të grumbullohen për të lëshuar reshje.
Sistemi aktual që përdoret për të ndryshuar ngarkesën elektrike të reve po drejtohet nga studiuesit në Universitetin e Reading në Angli dhe përllogaritet të jetë një investime prej miliona dollarësh.
Profesori Maarten Ambaum, i cili punoi në projekt, tha për BBC se Emiratet e Bashkuara Arabe kanë mjaftueshëm re për të krijuar kushte të përshtatshme për shiun.
Projekti përpiqet që pikat e ujit të bashkohen dhe të ngjiten. “Kur pikat të bashkohen dhe të jenë mjaft të mëdha, ato do të bien si shi”, tha Ambaum.
