Në protestë ditën e sotme janë ngritur edhe bizneset në Lezhë, pasi janë prekur nga ora policore e cila është vendosur për shkak të pandemisë globale të COVID-19.
Pronarët e lokaleve kanë dalë përballë Bashkisë së Lezhës dhe me anë të kësaj proteste kërkojnë shtyrje e orës policore. Ashtu si në Vlorë, biznesmenët kërkojnë që ora policore të shtyhet deri në 01:00. Gjithashtu ata janë shprehur se kufizimi i muzikës i largon klientët.
“Ne punojmë këto muaj, 11 muaj i vejmë çelësat tani punojmë. Të parët që penalizohen janë shqiptarët që vijnë nga jashtë. Kërkojmë që muzika të lejohet deri në 01:00. Kufizimi i muzikës na largon klientët. Këtu është bërë si për pleq.”- shprehen biznesmenët.
Kujtojmë se mbrëmjen e djeshme në shenjë proteste bizneset në Lungomare, kanë vendosur në sfond himni kombëtar për t’i kërkuar qeverisë që të plotësojë kërkesat e tyre. Himni është vendosur pak minuta para orës 22:00, kur është edhe orari që muzika është e ndaluar sipas aktit normativ.
Protestat ishin paralajmëruar që më herët për ndryshimin e orarit të mbylljes, pasi operatorët thonë se gjatë sezonit veror kjo gjë i ndikon negativisht bizneset, në një kohë kur shtohet edhe numri i turistëve. Ata i kishin drejtuar një letër kryeministrit, ku kërkonin që orari i lejimit të muzikës të shtyhet deri në orën 00:00, ndërsa orari i mbylljes të shtyhet deri në orën 02:00. Protesta ishte paralajmëruar pikërisht për mbrëmjen e sotme.
