Mbrëmjen e sotme kanë mbërritur në aeroportin e Rinasit dozat e radhës të vaksinës anti-Covid të Pfizer. Lajmin e mbërritjes së vaksinave e ka bërë të ditur kryeministri Edi Rama i cili gjithashtu shkruan në Facebook se deri tani në vendin tonë kanë mbërritur në total 1,238,790 doza të vaksinës për Covid-19.
“Aeroporti “Nënë Tereza” – 18,720 doza të vaksinës Pfizer mbërritën sot, duke e çuar në 1,238,790 numrin e vaksinave të mbërritura deri tani në Shqipëri
#ShqipëriaBuzëqesh”, shkruan kryeministri Edi Rama.
Kujtojmë që më herët gjatë ditës së sotme ministrja e Shëndetësisë, Ogerta Manastirliu lajmëroi mbërritjen e vaksinave teksa ndiqte nga afër procesin e njësive të lëvizshme të vaksinimit. Manastirliu bëri gjithahstu me dije se brenda muajit gusht do të mbërrijnë në vend edhe 500 mijë doza të tjera të vaksinës, pa thënë se të cilës kompani do të jenë. Ndër të tjera ministrja tha se do të vijojnë ditët e vaksinimit për personat mbi 18 vjeç edhe gjatë muajve korrik dhe gusht, ndërsa do të vazhdohet edhe me njësitë e lëvizshme të vaksinimit.
Ndërkohë, numri i rasteve me Covid në vendin tonë ditën e sotme ka qenë me pesë raste të reja dhe asnjë viktimë. Të pesta rastet e reja kanë qenë në Tiranë.
