Gjykata për Korrupsionin dhe Krimin e Organizuar ëhstë tërhequr për të dhënë vendimin për ish-kryebashkiakun e Lushnjës, Fatos Tushe dhe zyrtarët e tjerë të arrestuar të kësaj bashkie.
Seanca ka nisur që në orën 09:00 të mëngjesit të sotëm dhe përfundoi në orët e mbasdites, me gjyqtaren e Posaçme Danjela Shirka që u torhoq për të marrë një vendim në lidhje me çështjen.
Fatos Tushe dhe 10 zyrtarë të tjerë të Bashkisë së Lushnjës u arrestuan me urdhër të SPAK, pas operacionit që forcat RENEA ndërmorën në qytet. Ata akuzohen për shpërdorim detyre dhe korrupsion, në lidhje me tendera që ia kanë dhënë një kompanie pa iu përmbajtur procedurave përkatëse.
Kujtojmë që ditën e djeshme kryeministri Edi Rama firmosi vendimin e Këshillit të Ministrave për shkarkimin nga detyra të Tushes, pasi më parë kishte deklaruar se PS nuk do të bëhej mbulesë për askënd dhe se ai duhej të përgjigjes vetë para drejtësisë.
Ditën e sotme u publikuan edhe disa përgjime ku kuptohet se Tushe është duke biseduar me një biznesmen i cili i ankohet se një prej inspektorëve i ka bllokuar punimet ndërtimore. Nga hetimet rezulton se Tushe ka ndërhyrë duke favorizuar një ndërtim pa leje.
Në përgjime Tushe është duke biseduar me një person të quajtur Ismail Blliku, bisedë që është zhvilluar rreth mesditës së datës 5 mars të vitit 2021.
