Policia e Sarandës ka identifikuar dhe ka shpallur në kërkim tre autorët e ngjarjes që ndodhi ditën e djeshme në lagjen nr.4. Ata dhunuan avokatin Marjel Mejdiu me shkopa bejsbolli, për konflikte që dyshohet se kishin lidhje me pronësinë.
Mejdiu përfundoi në spital me fraktura në këmbë, duar dhe në pjesë të tjera të trupit. Në kërkim janë shpallur E. F., S. N. dhe A. R., për veprat penale “Plagosja e rëndë me dashje”, kryer në bashkëpunim, “Prodhimi, mbajtja, blerja apo shitja pa leje e armëve të ftohta” dhe “Shkatërrimi i pronës”. Policia është duke vijuar punën për lokalizimin e vendndodhjes dhe kapjen e tyre.
Njoftimi i policisë:
Specialistët për Hetimin e Krimit në Komisariatin e Policisë Sarandë kanë shpallur në kërkim policor shtetasit E. F., S. N. dhe A. R., për veprat penale “Plagosja e rëndë me dashje”, kryer në bashkëpunim, “Prodhimi, mbajtja, blerja apo shitja pa leje e armëve të ftohta” dhe “Shkatërrimi i pronës”. Këta shtetas, në bashkëpunim me njëri tjetrin, në lagjen nr. 4, në qytetin e Sarandës, pas një konflikti për motive të dobëta, kanë goditur me sende të forta në trup shtetasin M. M., 39 vjeç, banues në Sarandë dhe i kanë dëmtuar pjesërisht automjetin që ai drejtonte. Vijon puna për lokalizimin e vendndodhjes dhe kapjen e tyre.
