Katër anëtarët e familjes Gjoka, që pësuan djegie nga shpërthimi i zjarrit në hotelin e tyre në Velipojë, janë nisur për në Itali për të vijuar kurimin atje. “News24” raporton se vendimi i dërgimit të tyre në Itali, u bë për shkak të gjendjes së rënduar shëndetësore në të cilën ndodhen nëna me tre fëmijët.
Nga ngjarja e rëndë e ndodhur ditën e djeshme, pësuan djegie të shumta shtetaset Alketa Gjoka, 40 vjeçe; Daniela Gjoka, 19 vjeçe; Klarisa Gjoka, 15 vjeçe dhe Enrik Gjoka, 12 vjeç.
Pasi morën ndihmën e parë mjekësore në Spitalin Rajonal të Shkodrës, ata u transportuan me urgjencë në drejtim të Tiranës për mjekim më të specializuar.
Shpërthimi është regjistruar në katin e parë të ndërtesës ku ndodhej kuzhina e hotelit. Katër anëtarët e familjes Gjoka kanë pësuar djegie në masën 85-90% të trupit, si pasojë e flakëve të zjarrit. Dy prej të plagosurve, që janë edhe më të vegjlit në moshë, ndodhen në gjendje më kritike.
Si ndodhi ngjarja? Bombolat që shpërthyen rreth orës 7 të mëngjesit, ishin në një magazinë në pjesën e pasme të hotelit, që kanë shpërthyer njëra pas tjetrës. Kanë qenë forcat e policisë dhe ato zjarrfikëse që kanë shmangur që kjo ngjarje e rëndë të merrte përmasa edhe më tragjike, duke nxjerrë 5 bombolat të cilat ishin gati për të plasur.
