Pandemia duket se po shkon drejt fundit në vendin tonë. Aktualisht në spitalin Infektiv, i cili përkon me atë të COVID 1, po kurohen vetëm 3 pacient me COVID-19.
Lajmin e mirë e ka bërë të ditur ministrja e Shëndetësisë dhe Mbrojtjes Sociale, Ogerta Manastirliu. Me anë të një postimi në rrjetet sociale, ajo shkruan se këto indikator janë tepër premtues për një sezon turistik përtej pandemisë. Kujtojmë se prej më shumë se një muaj shifrat e pandemisë kanë pësuar ulje të ndjeshme.
“#Covid19/ Të dhënat nga Spitali Infektiv, ku aktualisht ka vetëm 3 pacientë të shtruar, rastet ditore të ulëta, pavarësisht numrit të lartë të testimeve dhe ulja e vazhdueshme e rasteve aktive, janë të dhëna premtuese për një sezon turistik përtej pandemisë”, shkruan Manastirliu.
Por pavarësisht bilancit të koronavirusit pak ditë më parë, Unioni Turistik shqiptar i është drejtuar me një letër Ministres së Shëndetësisë, Ogerta Manastirliut, Ministrit të Mjedisit Blendi Klosi dhe drejtoreshës së Komitetit Teknik të Ekspertëve për të ndryshuar masat anti-COVID.
Ata kërkojnë ndryshimin e orës policore si dhe lejimin e muzikës në lokale deri në mesnatë, ku aktualisht lejohet deri në orën 22:00. Kujtojmë se ditën e djeshme u shënuan 2 raste të reja me COVID dhe asnjë humbje jete.
