Një aksident ka ndodhur në Bjeshkët e Deçanit në Kosovë, ku një makinë garash për terrenet malore, ose siç njihen ndryshe “Rally Off Road”, ka dalë nga rruga dhe ka përfunduar në një greminë. Si pasojë e këtij aksidenti, ka mbetur i plagosur shoferi i kësaj makine, ndërsa kjo është konfirmuar për mediat në Kosovë edhe nga zëdhënësi i Policisë për Rajonin e Pejës, Driton Rugova.
Sipas këtij të fundit, shoferi i makinës ka marrë mjekimin e nevojshëm në spitalin e Pejës, ndërsa më pas është dërguar në Qendrën Klinike Universitare.
“Rreth orës 12:30 Policia është informuar për një vet-aksident në Bjeshkën e Deçanit. Si pasojë e këtij vetaksidenti, një person (shoferi i veturës) ka pësuar lëndime trupore. I njëjti është dërgua në Spitalin Rajonal të Pejës e më pas është transferuar në QKUK”, u shpreh zëdhënësi i Policisë për Rajonin e Pejës, Rugova.
Ndërkohë në rrjetet sociale është publikuar edhe video e momentit të aksidentit të rëndë, duke u bërë menjëherë virale. Për fat të mirë, nuk ka pasur person tjetër në makinë, pasi aksidente të tilla të mëparshme, kanë treguar se pasagjerët dëmtohen më shumë se shoferi.
Megjithatë, edhe në rastin e shoferit është absolutisht një aksident i frikshëm dhe ende nuk dihet gjendja shëndetësore të shoferit të makinës.
