Piloti 32-vjeçar Babis Anagnostopulos pranoi ditën e djeshme se kishte vrarë bashkëshorten e tij Caroline Crouch, vetëm 20 vjeçe në prani edhe të foshnjës së tyre. Ai rrëfeu në polici se e vrau të renë pasi kjo e fundit kishte kërkuar divorcin dhe i kishte thënë se do të largohej se bashku me fëmijën.
Ai tregoi se pasi e vrau Caroline, sajoi edhe historinë e grabitjes për të dalë i pafajshëm nga ngjarja.
Policia e arrestoi atë ditën e djeshme, ndërsa e mori me helikopter nga ishulli Alonisos ku po zhvillohej edhe ceremonia përkujtimore për Caroline. Para se ta merrnin në helikopter, atij iu tha se e kishin thirrur për të identifikuar një person që dyshohej si vrasësi. Policia deklaroi më vonë se e dinte që prej fillimit se Babis ishte vrasësi i Caroline.
Ditën e sotme ai është shoqëruar për në prokurori, ku shihet i rrethuar nga policët.
I ftohtë, me kokën lart dhe pa fjalë, i veshur me një jelek të bardhë antiplumb dhe maskë, ai u dërgua në zyrën e prokurorit për të ekzekutuar urdhrin kundër tij dhe më pas pritet të shkojë te hetuesi nga i cili do të kërkojë – dhe ndoshta do të marrë – disa ditë kohë për të përgatitur mbrojtjen e tij ligjore për dy krimet dhe dy kundërvajtjet për të cilat ai akuzohet.
