Policia e Izraelit arrestoi të dielën dy aktivistë të njohur palestinezë të cilët janë bërë fytyra e një fushate për të ndaluar dëbimet e palestinezëve nga një lagje e Jeruzalemit Lindor. Mbështetësit e Muna dhe Mohammed El-Kurd, të cilët janë binjakë, thonë se ndalimi i tyre është pjesë e një përpjekjeje më të gjerë izraelite për të ndaluar kundërshtimin ndaj dëbimeve në Sheik Jarrah, ku kolonët hebrenj duan të transferohen në shtëpinë e El-Kurdëve.
Pa e përmendur në mënyrë të qartë Muna El-Kurd, 23 vjeçe, një zëdhënëse e policisë Izraelite tha “policia arrestoi nën urdhrin e gjykatës një të dyshuar 23 vjeçe, e cila është një banore e Jeruzalemit Lindor, nën dyshimin e pjesëmarrjes në trazirat që ndodhën në Sheikh Jarrah kohët e fundit”.
Pamjet në mediat sociale treguan se ajo ishte prangosur dhe shoqëruar nga shtëpia e saj nga oficerët izraelitë më herët të dielën.
Policia nuk komentoi menjëherë për vëllain e saj binjak Mohammed, i cili u dorëzua në një stacion policie në Jeruzalemin Lindor pasi mori një thirrje policie.
“Ajo që po ndodh është që ata (Izraeli) duan të qetësojnë të gjithë zërat tanë në Jeruzalem,” tha babai i tyre, Nabil El-Kurd, duke u bërë thirrje të rinjve palestinezë për të protestuar jashtë stacionit të policisë në rrugën Salah Al-Din të Jeruzalemit Lindor.
