Kolegji Zgjedhor ka nisur ditën e sotme shqyrtimin për kërkesën ankimore të Partisë Demokratike dhe Lëvizjes Socialiste për Integrim, të cilët kanë kërkuar pavlefshmërinë e zgjedhjeve në qarkun e Gjirokastrës.
Përfaqësuesi i Partisë demokratike, Ivi Kaso pretendon se në procesin zgjedhor ka pasur ndikim, pasi qeveria në kundërshtim me ligjin ka krijuar favore për persona dhe kategori të ndryshme. Një çështje tjetër që është prekur në Kolegjin Zgjedhor ka qenë edhe karantina dy javore e vendosur nga Komiteti Teknik i Ekspertëve për emigrantët që do të vinin nga shtetet fqinje, Maqedoni e Veriut dhe Greqia.
Kaso ka pretenduar se edhe nëpunësve civil dhe arsimtarëve , iu është kërkuar raste konkrete të pjesëmarrjes së detyruar në takimet elektorale, por edhe lista që variojnë nga 30-40 emra.
“Është ndikuar procesi parapërgatitur me vendimmarrje të qeverisë, siç është vendimi për ndryshimin e pagave për mjekët. Struktura kriminale e vënë në punë nga mazhoranca është e njëjta në të gjitha qarqet. Ajo që ndryshon janë aktorët. Po ashtu në rastin e Gjirokastrës iu mohua një pjesë e mirë e shtetasve, që ishin jo mbështetës së mazhorancës për të marrë pjesë në zgjedhje. Nëpunësve civil, arsimtarëve iu kërkua raste konkrete për pjesëmarrje të detyruar në takime elektorale, por edhe lista që variojnë nga 20-30 emra,”-tha Kaso.
