Ambasadori i Bashkimit Evropian, Luigi Soreca me anë të një postimi në rrjetet sociale, shkruan se pret me padurim çeljen e negociatave të Shqipërisë me BE-në. Soreca thekson ndër të tjera se kushtet janë përmbushur dhe se tani ka ardhur koha që të bëni hapin e radhës. Ai thotë se Evropa është Shqipëri dhe se Shqipëria është Evropë.
“Evropa është këtu dhe këtu është Evropa! 🇪🇺🇦🇱
Tani po presim me padurim fillimin e bisedimeve të pranimit. Kushtet janë vendosur dhe janë përmbushur. Ka ardhur koha për ta bërë atë hap.
Shikoni fjalët e mia mbyllëse në fund të #Europeëeeks2021”, ka shkruar në rrjetet sociale Luigi Soreca.
Kujtojmë se përpara disa ditësh ministri gjerman për Evropën, Michael Roth ka zhvilluar një vizitë dy ditore, në vendin tonë. Ai ka zhvilluar takime me OltaXhaçkën, Edi Ramën dhe Lulzim Bashën, ku në qendër të diskutimeve kanë qenë negociatat.
Roth nga një vizitë në Shkup, konfirmoi se Shqipëria dhe Maqedonia e Veriut i kanë plotësuar të gjitha kushtet dhe është detyrë e BE të mbajë fjalën dhe çelë negociatat. Ai u shpreh se e ardhmja e Ballkanit Perëndimor është evropiane dhe se duhet të veprohet tani me vendosmëri, në mënyrë që të mos ketë dyshime më vonë.
