Ministri gjerman për Europën, Michael Roth, në deklaratën e tij pas takimit me kreun e opozitës, Lulzim Basha, është shprehur se është njohur nga afër me të gjithë shqetësimet për procesin zgjedhor të 25 prillit. Roth ka theksuar se në këtë proces, i besojnë ODIHR si në çdo rast kur ka zgjedhje.
“Të gjithë problematikat që janë adresuar duhet që të qartësohen nga autoritete dhe nga institucionet përkatëse. Në lidhje me këtë proces ne i besojmë ODIHR. Unë jam dakord me Bashën kur thotë se e ardhmja e Shqipërisë është në BE dhe askund tjetër. nëse kjo rrugë do të jetë e suksesshme nuk varet vetëm nga qeveria, por dhe nga parlamenti dhe nga opozita dhe uroj që të gjendet një rrugë e përbashkët mes qeverisë dhe opozitës. Në një sistem demokratik ne nuk jemi armiq me njëri tjetrin por jemi konkurrente, dhe parlamenti është ai që i dërgon para objektivat e vendit. Takimi me Bashën kreun e opozitës së Shqipërisë është shumë i rëndësishëm.
Komisioni ka mbërritur në një gjykim pozitiv dhe ne shpresojmë që në 22 qershor Këshilli evropian të mbërrijë në hapjen e negociatave dhe të zhvillimit të konferencës së përbashkët ndërkombëtare. Ky është një hap i rëndësishëm dhe është një rrugë e gjatë, Gjermania do e mbështesë, çelja e negociata nuk do të thotë që Shqipëria i plotësoi kushtet por që është një perspektivë e qartë drejt BE-së”, tha Roth.
