Kosova po vazhdon procesin e vaksinimit me ritmet shpejta. Sipas mediave në vend , numri i personave të vaksinuar ka arritur në mbi 58 mijë.
Nga ana tjetër Programi i Unicefit në Kosovë ka bërë me dije se këtë javë pritet që të mbërrijnë në Kosovë 100 mijë e 620 doza, nga COVAX.
Kosova ka marrë nga programi COVAX 24 mijë doza kurse në total ka përfituar rreth 62 mijë e 400 doza. Kosova e nisi shumë më vonë se vendet e tjera të rajonit vaksinimin. Gjithashtu kujtojmë se kryeministri Kurti ka premtuar se procesi nuk do të ndalet derisa 60% e popullatës të jetë vaksinuar plotësisht.
“Që nga arritja e kontingjentit të parë prej 24,000 dozave të vaksinave COVID-19 në muajin mars, Kosova ka pranuar në total 62,400 doza të vaksinës përmes COVAX Facility.
Në ditët në vijim pritet të arrijnë në Kosovë përmes COVAX Facility edhe 100,620 doza tjera të vaksinës COVID-19.”, postimi i UNICEF Kosova.
Nga përditësimi i të dhënave, numri i infeksioneve në Kosovë është ulur ndjeshëm. Gjatë 24 orëve të fundit Instituti Kombëtar i Shëndetësisë ka njoftuar vetëm 11 raste të reja me Covid nga 3.291 testime të kryera. Gjithashtu, sot është raportuar vetëm një viktimë si pasojë e virusit. Numri total i rasteve pozitive është 107.269 raste nga 597.019 persona të dyshimtë në virusin SARS-CoV-2 dhe 2.241 raste të vdekjes.
