Ashtu si është parashikuar, është mbledhur sot Komisioni Hetimor për shkarkimin e presidentit ilir Meta. Kreu i këtij komisioni, Alket Hyseni bëri thirrje që anëtarët e këtij komisioni duhet t’i referohen vetëm ligjit dhe duhet që të zbatojnë Kushtetutën, duke kaluar kështu përtej emocioneve dhe bindjeve politike.
“Në bazë të provave të administruara, postimeve të ndryshme, pamjeve filmike, reagimet e komuniteteve, që të gjykohet mbi bazë të respektit të Kushtetutës, të ligjeve të Republikës dhe të jemi sa më objektiv, përtej emocioneve dhe bindjeve politike dhe përkatësisë politike të secilit nga ne.”, tha Hyseni.
Nga ana tjetër Klotilda Bushka u shpreh se Komisioni Hetimor është në një fazë ku nuk kanë më nevojë për prova të reja, provat janë administruar dhe se objekti hetimit është në qoftë se aktet e kryera deri më tani nga Presidenti janë kundër Kushtetutës.
“Jemi në fazën ku nuk kemi më nevojë për prova të reja. Provat janë administruar para Komisionit. Jemi një komision hetimor që po diskutojmë mbi shkeljet e bëra të Presidentit nga 49 deputetë që kanë firmosur këtë nismë. Objekti i hetimit është hetimi dhe verifikimi nëse aktet e kryera dhe deklaratat e dhëna nga presidenti, gjatë fushatës dhe ditën e heshtjes zgjedhore dhe në 25 prill, nëse janë kundër kushtetutës.”, tha Klotilda Bushka.
Kujtojmë se burime të sigurta për Gazetën Reforma Komisioni Hetimor Parlamentar do të shkarkojë presidentin Ilir Meta këtë javë ose brenda javës tjetër, në varësi të kohëzgjatjes së procedurës.
