Protestë masive në sheshin Skënderbej pas përdhunimit 15-vjeçares nga Lezha. Kjo ngjarje ka nxitur shumë qytetarë të ngrihen në protestë sot dhe me pankarta e brohoritma, kanë shprehur mbështetjen e tyre për 15-vjeçaren e dhunuar.
Gjithashtu, protestuesit kanë dhe një mesazh për qeverinë, pasi duan që gratë dhe vajzat të jenë të sigurta e të mbrojtura nga fenomeni i përdhunimit.
Por si ndodhi ngjarja në Lezhë, ku e mitura 15-vjeçare u dhunua seksualisht?
Mësohet se 5 personat i kanë dhënë një telefon e më pas i kanë thënë se i duhet përgjigjur për çdo rast pasi në të kundërt do t’i vrasin motrën dhe familjarët.
“E kanë kërcënuar me armë, i kanë dhënë lëndë narkotike, e kanë rrëmbyer teksa po kthehej nga shkolla, e kanë çuar larg fshatit. Ata e kanë rrëmbyer me një makinë, ku i kanë dhënë diçka për të pirë. Vajza ka thënë se nuk mban mend pastaj asgjë. Pasi e kanë abuzuar, ata i kanë dhënë një telefon dhe i kanë thënë të përgjigjet në çdo rast, pasi në të kundërt do t’i vrasin motrën, familjarët. Unë isha te familja, ata janë në gjendje shumë të rënduar, vetëm qajnë”, tha gazetarja.
Ngjarja e rëndë u bë e ditur ditën e djeshme. 5 personat në bashkëpunim me njëri-tjetrin e kanë shantazhuar vazhdimisht me foto dhe video në rrjetet sociale, duke e detyruar që të kryejë marëdhënie seksuale me dhunë. Artan Kaçorri 31-vjeç, Albert Molla, Ermal Tarazhi 30-vjeç, Nike Lleshi 44-vjeç dhe 17 vjeçari Adrian Gjikola, janë të gjithë personat që kanë detyruar të miturën të kryejë marrëdhënie seksuale me dhunë. Njëri prej 5 personave që ka përdhunuar 15-vjeçaren në Lezhë, ka qënë i dashuri i saj.
