Kryeministri Edi Rama ka deklaruar para mësuesve se pagat e tyre do të rriten me 40% Brenda këtij mandate. Në fjalën e tij kryeministri u shpreh se ka mësues që janë më të mirë edhe se drejtorët, ndërsa këta të fundit nuk duhet të jenë monoklaturë e deputetëve dhe kryetarëve të bashkive.
“Rritja e pagave për ju 40 përqind do i qëndrojmë deri në fund brenda këtij mandati. Mësuesit sot punojnë në kushte shumë më të mira, por ka edhe shkolla që kanë nevojë të rindërtohen. Nxënësve t’ju japim më shumë zeje dhe të ushtrohen, për të pasur një zanat në të ardhmen. Ne do të fusim anglishten që në klasën e parë. Këtë e bëjmë, që shqipja dhe anglishtja të jenë dy gjuhë, që të njihen nga fëmijët e Shqipërisë. Kemi mësues që janë më mirë se edhe drejtorët. Të njëjtën gjë që bëjmë me mësuesit, të bëjmë edhe me drejtorët. Drejtorët nuk duhet të jenë monoklaturë e deputetëve dhe kryetarëve të bashkive”, tha Rama.
Më tej ai shprehu respektin e tij për mësuesit që dhanë mësim në kohë pandemie, ndërsa tha se mësimi online nuk e zëvendëson dot mësimin e drejtëpërdrejtë.
“Respekt i çmuar për mësuesit që dhanë mësim në kohë pandemie, sfiduan çdo vështirësi. U jam falënderues dhe gjithë shoqëria po ashtu falënderon ata mësues, që kanë punuar ditë e natë dhe janë vënë në dispozicion të nxënësve. Kjo ishte punë që iu shërbeu edhe shumë mësuesve dhe mësueseve. Sot që po dalim nga tuneli i pandemisë dhe puna është bërë me kaq shumë ritëm e efikasitet. Ne jemi përballur prej vitesh me fenomenin shqetësues të shkollave kolektive. Mësimi online nuk e zëvendëson dot mësimin e drejtpërdrejtë. Por, patjetër që mësimi online është lojë e shtuar”, u shpreh Rama.
Kryeministri tha se është krenar për mësuesit e Shqipërisë, por jo aq për drejtorët e shkollave. Ai tha se figura e mësuesit duhet të vazhdojë të lartësohet. Dhe nuk do të harrojë që të rrisë shpërblimin ndaj tyre.
“Jam krenar për mësuesit dhe mësueset e Shqipërisë, jo aq krenar për drejtorët e shkollave. Jam krenar që kemi mësues të qetë, në raport me të drejtën e ushtrimit të profesionit, të patrazuar nga politika apo gjëra të tjera, që e kanë pengua punën tuaj. Mësuesit nuk i lëviz njeri nga vendi i punës me arbitraritet. Figurën e mësuesit do vazhdojmë ta lartësojmë. Me punën, keni treguar shkallë qytetarie në raport me njerëzit, sepse ka qenë punë mbi punë. Kjo punë nuk ka pasur ndonjë shpërblim të veçantë, por përpos atij ushqimi që e ushqen vazhdimisht mësuesi, sepse është përhapës i dritës. Nuk harrojmë detyrimin për rritje shpërblimi ndaj jush”, përfundoi Rama.
