Në komentet e tij të para në lidhje me sulmin ajror izraelit në Gaza kreu i Organizatës Botërore të Shëndetësisë, Tedros Adhanom Ghebreyesus tha përveç shqetësimeve të thella për sigurinë dhe krizën humanitare, “situata shëndetësore është gjithashtu mjaft shqetësuese”, shkruan Al Jazeera.
“Në përshkallëzimin e fundit të konfliktit, dhjetëra incidente që përfshijnë punonjës shëndetësorë dhe objekte shëndetësore kanë ndodhur,” u tha ai gazetarëve.
“Për më tepër, testimi dhe vaksinimi i COVID-19 është ndikuar rëndë,” tha ai, duke paralajmëruar se “kjo krijon rreziqe shëndetësore për botën në tërësi”.
Ndërkohë, Organizata Çlirimtare e Palestinës tha se laboratori i vetëm i koronavirusit në Gaza nuk ishte më funksional.
Ushtria izraelite nisi një seri tjetër sulmesh ajrore në Rripin e Gazës herët të hënën, disa orë pasi kryeministri Benjamin Netanyahu tha se sulmet ndaj enklavës palestineze do të intensifikoheshin.
Shpërthimet tronditën qytetin e Gazës nga veriu në jug në një bombardim më të rëndë, më të gjerë dhe zgjati më shumë se sulmet ajrore që vranë të paktën 42 palestinezë dhe plagosën dhjetra të tjerë të dielën. Një palestinez u raportua i plagosur.
Më parë, Hamas, grupi që qeveris Rripin e Gazës, gjuajti raketa drejt qyteteve izraelite të Ashkelon dhe Beersheba. Izraeli ka raportuar 10 të vdekur, përfshirë dy fëmijë.
Të paktën 212 njerëz në Gaza tani janë vrarë, tha Ministria e Shëndetësisë e Gaza, duke përfshirë 61 fëmijë dhe 36 gra.
