Është zbuluar emri i kompanisë që porositi ngarkesën me mish nga Brazili, ku sot u gjetën 400 kg kokainë. Kompania që e ka porositur ngarkesën është Mcfood.
Mësohet se kompania ka një filial edhe në Shqipëri dhe në rajon me të njëjtin emër, por me pronar të ndryshëm. Sipas dokumentit të QKR, kompania rezulton me dy ortakë. Izet Sheqiri në Kosovë dhe Bledar Habili në Shqipëri.
Sasia e kokainës kaloi nga porti i Durrësit, ndërsa ka qenë DEA amerikane që ka sinjalizuar për ngarkesën. Ajo ka dhënë informacionin se bëhet fjalë për një sasi kokaine që kishte destinacion Lipjanin në Kosovë.
Kokaina u lejua të kalonte transit nga Shqipëria, ndërsa ishte nën kontroll që prej nisjes dhe gjatë gjithë itinerarit të përshkuar.
Operacioni u krye në mënyrë të koordinuar nga Policia Shqiptare, Policia e Kosovës, Policia Italiane dhe DEA amerikane. Autoritetet shqiptare kishin dy muaj që prisnin këtë ngarkesë pasi u sinjalizuan nga DEA amerikane. Pas mbërritjes së kontejnerit në Durrës, Policia Shqiptare nuk ka ndërhyrë me qëllim që të zbulonte të gjithë rrugën dhe destinacionin final të ngarkesës për te porositësit.
Ministri i Brendshëm i Kosovës, Xhelal Sveçla ka falenderuar partnerët që ndihmuan në operacion, ndërsa në vazhdim pritet një konferencë e përbashkët e Ministrisë së Brendshme të Kosovës dhe asaj të Shqipërisë.
