Ministria e Jashtme e Izraelit ka falenderuar Kosovën për përkrahjen që i ka dhënë në luftën ndaj Palestinës. Në faqen e vet në Tëitter, Ministria ka shpërndarë qëndrimin e Kosovës në lidhje me konfliktin në lindjen e mesme, e po ashtu drejtori i Departamentit për Euro-Azi në Ministrinë e Punëve të Jashtme në Izrael, Yacov Livne, e ka falenderuar Kosovën për përkrahjen.
“Faleminderit Kosovë”, shkruan Livne në postimin e rishpërndarë të Prishtinës zyrtare.
Kosova ishte ndër shtetet që u rreshtuan krah Izraelit në konfliktin e rindezur mes shtetit izraelit dhe militantëve të Hamasit. Në reagimin zyrtar të Kosovës thuhej se Izraeli ka të drejtë të mbrojë popullin e tj kundër më shumë se 2 mijë raketave që Hamasi ka qëlluar në drejtim të civilëve.
“Si çdo shtet, Izraeli ka të drejtën dhe detyrimin për të mbrojtur popullin e tij kundër 2000 raketave të qëlluara mbi civilët vetëm nga Hamas, i cili po mban peng civilët palestinezë në luftën e tij.
Ne vajtojmë të gjitha viktimat. Ne kërkojmë që të përmbahemi, të ndalojmë dhunën dhe të kërkojmë zgjidhje paqësore”, thuhej në deklaratën e Ministrisë së Jashtme të Kosovës.
Deri tani nga bombardimet e Izraelit janë vrarë të paktën 188 palestinezë, mes tyre 55 janë fëmijë, 33 janë gra dhe janë plagosur më shumë se 1200 të tjerë. Të paktën 13 njerëz janë vrarë në Bregun Perëndimor.
