Gjatë paraqitjes së tij publike para disa minutash, kryeministri Rama është dukur i shqetësuar dhe kjo më shumë dallohej nga zëri i tij, mirëpo nuk ka munguar as mesazhet e forta që ka transmetuar.
Rama ka thënë se është kurdoherë gati dhe se mazhoranca i shtrin dorën për dialog dhe bashkëpunim opozitës kurdoherë. Rama e ka thënë me zë dhe figurë se është gati të ulet dhe të dialogojë, por për ta realizuar këtë ka disa kushte, tek të cilat përfshihen: jo retorikë të dhunshme dhe mospretendim për ndryshim qeverie. Këto dy kushte Rama i ka vendosur pasi sipas tij mandatin ia ka dhënë populli dhe vetëm ai ka të drejtë t’ia marrë mbrapsht.
“Kemi qenë dhe jemi dhe do të jemi gati të ulemi dhe të dialogojmë. Një ndër gjërat që mund të diskutohet është forcimi i demokracisë, por nuk është as retorika e dhunshme, as ndryshimi i qeverisë, as ndërprerja e një mandati legjitim qeverisës. Ata e dinë se humbjen e zgjidhjeve vendore e kanë të pashmangshme”, theksoi Rama.
Kryeministri tha se qeveria do vazhdojë punën e saj dhe do të largohet vetëm kur të ketë zgjedhje, në qershorin këtij viti por dhe në zgjedhjet e vitit 2021.
“Është ditë e keqe për demokracinë, s’ka dyshim, është e dëmshme për produktivitetin kjo zgjedhje e opozitës, është një fatkeqësi e këtij vendi. Është një goditje që mund të rezultojë edhe fatale për çeljen e negociatave këtë vit. Ashtu sikurse pamjet e turpshme të të shtunës mund të kenë pasoja në ekonomi dhe turizëm. E kam shqetësim edhe që opozita sot është kthyer në shqetësim real për partnerët tanë strategjik, BE dhe SHBA”, tha Rama. Por, kreu i qeverisë shtoi se opozitën nuk e zgjedhim, thjeshtë e pranojmë pa kushte dhe përpiqemi t’i krijojmë kushtet që të kontribuojë sa më shumë.
Të gjithë deputetët e opozitës kanë rënë dakord që në bllok të heqin dorë nga mandatet e tyre parlamentare. Një pjesë e mirë e tyre këtë të enjte, ju drejtuan me fjalime të shkurtra mbështetësve të shumtë që morën pjesë në protestë. Ndaj këtij vendimi, apo dhe ngjarjeve të dhunshme gjatë protestës të së shtunës, ka pasur reagime kritike nga Brukseli apo dhe Uashingtoni. Por në fjalën e tij përpara protestuesve, zoti Basha u shpreh se “mesazhi ndaj miqve tanë është se ne nuk jemi popull i dhunës, jemi popull i lirisë, i demokracisë. Jemi e ardhmja evropiane e Shqipërisë. Por ne nuk do pranojmë kurrë më një kryeministër bandit, të kapur në flagrancë duke vjedhur vullnetin e popullit në bashkëpunim me bandat e krimin, duke vjedhur qindra miliona nga xhepat e shqiptarë që nuk paguajnë dot bukën e gojës”, u shpreh zoti Basha, duke shtuar se “kërkoni gjithçka që mund t’ju jap, por mos më kërkoni kurrë të pranoj për popullin tim atë që nuk do pranonit për popullin tuaj”.
