Ish-kryeministri i Kosovës, Ramush Haradinaj i ka dhënë të drejtë kryeministrit aktual, Albin Kurtit për refuzimin që i bëri takimit të 11 majit me presidentin serb, Aleksandër Vuçiç. Në një status në Facebook Haradinaj shkruan se takimi ishte caktuar nga Vuçiç dhe Borell pa konsultim me palën kosovare dhe takime të formatit të tillë duhet të dakordësohen me institucionet e Kosovës.
Postimi i plotë i Haradinajt:
Refuzimi i Kryeministrit Kurti të takimit të 11 majit është i drejtë.
Ai takim ishte caktuar nga Borell e Vuçiq pa konsultim me palën kosovare. Takimet e formatit të tillë, duhet paraprakisht të dakordohen me institucionet e Kosovës.
Praktika e dakordimit Bruksel – Beograd, duke nxjerrë Kosovën para aktit të kryer, nuk do të pranohet asnjëherë nga Kosova.
Kryeministri i Kosovës, Albin Kurti refuzoi takimin me Vuçiç dhe me Borell në Bruksel në 11 maj duke thënë se nuk do të marrë pjesë duke qenë se nuk e ka konfirmuar paraprakisht pjesëmarrjen.
“Unë nuk marr pjesë në atë takim për të cilin nuk e kam konfirmuar paraprakisht pjesëmarrjen. Ajo çka mund të konfirmoj është se do të vij në Bruksel për ndonjë drekë ose darkë pune të konfirmuar nga Borrell, ku bëjnë pjesë liderët e Ballkanit Perëndimor”, deklaroi Kurti.
