Kryeministri Edi Rama ka bërë daljen e parë publike që kur votoi sot paradite. Në një konferencë për shtyp ai nuk pajtohet me exit-poll-et para numërimit të votave por thotë të pritet rezultati real. Gjithashtu ai sërish nuk harroi që të falenderonte patronazhistët. Rama theksoi se populli e dh averdiktin e tij tani ne duhet të jemi në pritje të rezultatit. Tani ka thënë Rama është rezultati i kutive që është edhe verdikti final. Gjithashtu ai falenderoi të gjithë qytetarët dhe iu bëri thirrje që ta ndjekin procesin e numërimit të qetë.
“Për herë të parë në Shqipëri zhvillohen exit-polle dhe dua t’i falenderoj të gjithë ata që u angazhuan për këtë eksperiencë në Shqipëri dhe dua njëkohësisht t’u them të gjithëve në radhë të parë socialistëve se votat janë në kuti, populli ka folur, tani duhet të dëgjojmë popullin dhe detyra e çdo numëruesi dhe vëzhguesi është që me përgjegjësinë më të lartë qytetare e ligjore të kontribuojë në numërimin korrekt të votave në kuti.
Hamendjet, sondazhet, exitpoll-et pavarësisht faktit që ne na japin forcë qeverisëse i përkasin parashikimeve para ndeshjes. Tani është rezultati i kutive, që është rezultati i ndeshjes. Përqëndrohuni në detyrën tuaj dhe njëkohësisht e përsëris atë që tha Bora edhe në emrin tim, një falenderim nga zemra për të gjithë patronazhistët në gjithë Shqipërinë që kanë bërë një punë mbresëlënëse,” tha Rama.
