Partia Demokratike në Vlorë ka denoncuar shpërndarjen e tollonave të karburantit nga ana e Agjencisë Rajonale të Bujqësisë tek fermerët.
PD ka bërë kallëzim penal ndaj kësaj agjencie dhe konkretisht për përgjegjësin e sektorit të drejtorisë Rajonale të Extensionit Bujqësor, Fejzi Nezha, për veprën penale “Korrupsion aktiv në zgjedhje” ditën e sotme që është heshtje zgjedhore. Në njoftimin e degës së PD në Vlorë thuhet se kallëzimi në Prokurori është shoqëruar me fakte dhe pamje filmike të cilat vërtetojnë pretendimin.
Deklarata e plotë e PD, Vlorë:
Partia Demokratike dega Vlorë ka dorëzuar pranë organit të Prokurorisë së shkallës së parë të rrethit gjyqësor Vlorë kallezimin penal drejtuar Agjencisë Rajonale të shërbimit veterinar dhe mbrojtjes së bimëve, konkretisht për përgjegjësin e sektorit të drejtorisë Rajonale të Extensionit Bujqësor, Fejzi Nezha.
Kallëzimi ka ardhur pasi sipas Partisë Demokratike, ky i fundit ditën e sotme ( 24 prill 2021, heshtje zgjedhore) ka kryer veprën penale të Shpërdorimit “Korrupsion aktiv në zgjedhje” parashikuar nga neni 328\a. Nezha, si drejtues i sektorit dhe punonjës të tjerë të Agjensise Rajonale të Bujqësisë, ditën e sotme kanë shpërndarë tollona karburanti tek fermerët.
Partia Demokratike e Vlorës e ka shoqëruar kallëzimin në Prokurori me fakte, pamje filmike të cilat vërtetojnë pretendimin.
