Ditën e djeshme mbështetës të PD-së në Maqellarë të Dibrës ndaluan një makinë për të cilën thanë se po shpërndate para në këmbim të votave. Pas ngjarjes në fjalë, kandidati democrat për Dibbrën, Xhelal Mziu bëri një deklaratë të fortë ku tha se çdo person i dyshimtë do e pësonte si ai i Elbasanit.
“Kemi ngritur grupet e gatshme. Nga sot e në vazhdim, çdo person i dyshimtë që lëviz në lagjet tuaja, mjafton një telefonatë dhe ai do ta pësojë njësoj si ai i Elbasanit”, u shpreh Mziu.
Më vonë Mziu deklaroi se i vjen keq për komentin e panevojshëm dhe se mbështet zgjedhje të lira e është kundër dhunës.
“Me sinqeritetin më të madh, shpreh keqardhjen time dhe pendesën time për komentin tim të panevojshem dje, për shkak të emocioneve të forta të momentit
Dua të jem i qartë: unë mbështes zgjedhje të lira dhe të ndershme dhe jam KUNDËR dhunës!
Jam penduar thellë për komentin tim dhe kërkoj ndjesë para gjithë shqiptarëve”, tha Mziu.
Nuk ka vonuar as reagimi i ambasadores amerikane, Yuri Kim e cila shkruan se i vjen mirë që po sheh një ndjesë nga Dibra. Ajo thotë se ngjarja e Elbasanit nuk mund të justifikohet dhe nuk duhet përdorur për të nxitur emocione mes mbështetësve.
“Më vjen mirë që shoh një ndjesë nga Dibra. Dhuna e shkaktuar në Elbasan këtë javë nuk mund të justifikohet, nuk duhet të përsëritet. Ditët e grupeve të armatosura që mbajnë copën e ndonjë partie politike dhe “patrullojnë” rrugët i përkasin të kaluarës – një e kaluar e shëmtuar që të gjithë duhet ta refuzojmë.
Ky incident nuk duhet të përdoret për të sulmuar me egërsi njërën palë ose tjetrën, për të nxitur emocione në mes të mbështetësve. Përkundrazi, kjo duhet të bëjë që të gjithë udhëheqësit të reflektojnë se si ata mund ta drejtojnë Shqipërinë larg nga e kaluara dhe drejt një të ardhme më të mirë.”, shkruan ambasadorja Kim në Twitter.
