Kreu i Partisë Demokratike, Lulzim Basha ka deklaruar se gjëja e parë që do të bëjë kur të vijë në pushtet, do të jetë heqja e imunitetit për ministrat, deputetët e kryeministrin. Ai ka qenë i ftuar në emisionin “A shoë” të gazetarit Adi Krasta, Basha tha se nuk mundtë ketë një njeri që të jetë përtej ligjit. Kryedemokrati deklaroi se askujt nuk duhet t’i duket vetja Zot mbi zotër e të fillojë të luajë me pronat e shqiptarëve.
“Gjëja e parë që do të ndodhë, është që ne do të heqim, çfarëdo imuniteti të mbetur kryeministrit, ministrave dhe deputetëve. Pra, unë, nesër si kryeministër, nuk do të kem asnjë imunitet nga gjyqësori dhe ky është standardi britanik apo jo?
Kemi Italinë, ish-kryeministrin apo ish-kryeministrat, pra është një standard europian. Nuk mund të ketë një njeri të gjitha pushtetet dhe të jetë përtej ligjit. Pra, kjo është garancia që gjërat do fillojnë të funksionojnë ndryshe dhe në fakt, ne e kërkuam këtë duke qenë në opozitë, kërkuam vetting-un politik, po le të flasim për ato që do bëjmë pas 25 prillit. E para dhe garancia e parë është që kjo shtyllë e rëndësishme që garanton demokracinë, që garanton që të mos çmendet kryeministri nga pushteti e t’i duket vetja Zot mbi zotër, e të fillojë të luajë me pronat e shqiptarëve e t’u thotë “Thuaju atyre t’jua legalizojë sepse sapo t’jua marr votën, do t’jua prish, madje do t’u fus edhe gaz lotsjellës e nuk do t’u jap asnjë lek”, janë njerëz, qindra, mijëra familje, është puna e jetës së tyre, është djersa e jetës së tyre”, deklaroi Basha.
