Goditet me thikë një 19-vjeçar në Kukës, shpallet në kërkim autori 21-vjeçar. I riu i plagosur, është në gjendje të rëndë! Ngjarja ka ndodhur ditën e djeshme, për motive të dobëta. Policia e Kukësit po punon për kapjen e autorit, shtetasin me iniciale F. C, 21-vjeç.
Njoftimi i policisë/ Kukës
“Goditi me mjet prerës një shtetas për motive të dobëta, shpallet në kërkim autori. Specialistët për Hetimin e Krimeve në Komisariatin e Policisë Kukës shpallën në kërkim shtetasin F. C., 21 vjeç, banues në Kukës dhe po punohet për kapjen e tij.
Ky shtetas, gjatë mbrëmjes së djeshme, në qytetin e Kukësit, për motive të dobëta, ka goditur me mjet prerës, shtetasin A. D., 19 vjeç, banues në Kukës, i cili ndodhet në gjendje të rëndë shëndetësore.
Materialet i kaluan Prokurorisë së Rrethit Gjyqësor Kukës, për veprën penale “Vrasja me dashje” mbetur në tentativë”.
Nuk është hera e parë që në Kukës ka pasur sherre me mjete therëse mes të rinjve dhe në shumicën e rasteve, kanë qenë për motive të dobëta. Situata në këtë qytet nuk duket aspak e qetë dhe të rinjtë, ndoshta dhe nga “përgjumja” e policisë, vazhdojnë të jenë problematikë me veprimet e tyre. Nuk ka ende detaje për gjendjen e të plagosurit, i cili po merr mjekimin e nevojshëm.
