Për kandidatin e Partisë Socialiste, Plarent Ndreca e vetmja e dhënë personale është karta e identitetit. Sipas Ndrecës, numri i telefonit dhe adresa nuk janë të dhëna personale.
Këto deklarata kandidati socialist për Tiranën i bëri në emisionin „Çim Peka Live“ në Syri TV, ku ka qenë i ftuar për të folur rreth skandalit të të dhënave të votuesve që Partia Socialiste Zotëron. Ndreca ka thënë se database merr çdo parti politike.
”Për mua, e vetmja e dhënë personale është ID (karta e identitetit). Është një institucion që i mbron të dhënat personale të qytetarëve. Database e merr çdo parti politike. Numri i telefonit nuk është e dhënë personale. As adresa nuk është e dhënë personale”,- tha Ndreca.
Skandali i të dhënave u bë publik pak ditë më parë dhe rezultonte se Partia Socialiste zotëronte një database me të dhëna të votuesve që i kishte marrë nga portali e-Albania. Në database ishin të renditur 910 mijë votues në qarkun e Tiranës dhe secilit prej tyre i ishte caktuar nga një person që i mbikëqyr që quhet “patronazhist”. Çdo person klasifikohet sipas preferencës politike dhe partisë që voton dhe nëse e ka të sigurt votën apo jo, ose nëse për të nuk ka informacion.
