Policia e Kurbinit ka dalë me informacion zyrtar për ngjarjen e ndodhur ditën e sotme në qendër të qytetit të Mamurrasit ku mbetën të plagosur 3 persona, mes tyre edhe dy policë. Sipas njoftimit të policisë, ka qenë një prej punonjësve të poicisë, që ka nxjerrë armën e shërbimit dhe ka qëlluar duke plagosur dy kologët e tij, Ilir Zeka dhe Flamur Lleja dhe një person të përfshirë në ngjarje, Nikoll Vorfi.
Njoftimi i policisë:
Rreth orës 13:35, në qendër të qytetit të Mamurrasit disa persona janë konfliktuar me punonjësit e Policisë të Patrullës së Përgjithshme që ishte me shërbim në qytet. Një nga punonjësit e Policisë ka nxjerrë armën e shërbimit dhe ka qëlluar dhe për pasojë janë plagosur dy kolegët e tij, I. Z. dhe F. LL., si dhe një nga personat e përfshirë në konflikt, shtetasi N. V., të cilët ndodhen jashtë rrezikut për jetën. Është krijuar menjëherë një grup i posaçëm hetimor, i përbërë nga Specialistë të Hetimit në Shërbimin për Çështjet e Brendshme dhe Ankesat në Ministrinë e Brendshme dhe Specialistë të Hetimit në Drejtorinë Vendore të Policisë Lezhë, dhe nën drejtimin e drejtuesit të Prokurorisë së Rrethit Gjyqësor Kurbin, vijon puna intensive në vendin e ngjarjes, duke administruar çdo provë dhe po marrin dëshmi, me qëllim sqarimin në mënyrë të plotë dhe të gjithanshme të kësaj ngjarjeje. Informacion më të detajuar do të japë Shërbimi për Çështjet e Brendshme dhe Ankesat, në përfundim të veprimeve të para hetimore.
Ngjarja ndodhi idtën e sotme dhe dyshohet se arsyeja ka qenë një konflikt për motive të dobëta. Gjithashtu drejt Mamurrasit është nisur edhe drejtori i Policisë, Ardi Veliu dhe Forcat e Ndërhyrjes së Shpejtë.
