Emigrantët që jetojnë në Itali tashmë duhet të jenë më të qetësuar pasi ka një lajm të mirë. Të gjithë emigrant që kanë paguar dhe paguajnë rregullisht kontributet shoqërore këtu në vendin tonë, do t’ju njihet e drejta e pensionit.
Ky është një propozim ligjor i dorëzuar tashmë pranë Parlamentit Italian, prej nga është edhe duke u pritur përgjigje.
Kjo është hera e parë që është prezantuar një amendament i tillë ligjor pranë institucionit më të rëndësishëm të një shteti, i cili parashikon nënshkrimin e një rezolute mes dy shteteve.
Për Ora News, senatori Italian, Tomaso Nannicini, i cili është në profesion ekonomist, ndërkohë që aktualisht mban postin e anëtarit të Komisionit Parlamentar të punës, ka folur rreth kësaj çështjeje e cila është shumë e rëndësishme.
“Më në fund Italia e Shqipëria mund të firmosin një rezolutë të përbashkët me burime financiare të garantuara për të gjithë emigrantët shqiptarë që kanë derdhur kontribute shoqërore gjatë viteve të tyre të punës e që mund t’u njihen kur të kthehen në Shqipëri apo dhe anasjelltas. Italia ka marrëveshje të tilla me mjaft vende të tjera jo europiane si me Argjentinë, me Tunizinë etj e nuk kuptohet pse ende nuk ka një marrëveshje të tillë me Shqipërinë, e cila është një vend mjaft i rëndësishëm për ne, jo vetëm për miqësinë që na lidh por dhe për shkëmbimin ekonomik e për fluksin e madh të punonjësve”, ka thënë Tomasso Nannicini.
Në Itali janë aktualisht gati 170 mijë emigrantë shqiptarë që punojnë e që paguajnë rregullisht kontributet shoqërore. Ndaj edhe vet Nannicini thotë se është e drejta e tyre që për këto kontribute të paguara, ata të kenë mundësinë e një pensioni në të ardhmen.
“Po janë mbi 160-170 mijë emigrantë shqiptarë që paguajnë rregullisht e kontribuojnë në shumë sektorë të ekonomisë italiane e minimumi që duhet t’i garantojmë është që kontributet shoqërore që paguajnë sot t’i japin të drejtën e një pensioni në të ardhmen. Ky amendament ka kaluar pozitivisht në komisionin e bilancit në parlamentin italian i cili ka njohur garancinë e burimeve financiare për realizimin e tij. Ekziston një tendencë politike për pengimin e këtij amendamenti nga ana e mazhorancës parlamentare 5 Yjet-Lidhja, e unë i ftoj publikisht të mos ndahemi e ta aprovojmë këtë amendament i cili pritet të votohet së shpejti në sallën e parlamentit”, ka thënë më tej ai.
