Kryeministri i vendit, Edi Rama vazhdon takimet elektorale për zgjedhjet e 25 prillit. Rama nga Cërriku është shprehur se vota nuk është çështje personale, por me rëndësi për fatin e vendit. Një ditë pasi Partia Demokratike publikoi në media skandalin se PS, ka keqpërdorur të dhënat e qytetarëve për zgjedhjet. Nga Cërriku Rama thotë që e krijoi E-Albania-n që njerëzit të kapërcenin hallkat e burokracisë.
“Me shumë krenari mund t’ju them se jam kryeministri që e kam shëtitur më shumë Shqipërinë, jo për turizëm por për punë, më shumë se të gjithë kryeministrat e shtetit shqiptar të marrë së bashku. Sikundër u jam përgjigjur të gjithëve edhe në telefon. Kam ndërtuar një sistem të tërë, platformën e bashkëqeverisjes, apo E Albania-n që njerëzit t’i kapërcejnë hallkat e burokracisë dhe t’i shmangin ata që ju dalin përpara në emër të shtetit dhe i pengojnë”, tha kreu i qeverisë.
Ndër të tjera Rama ka shtuar se nuk e kanë futur në politikë se nuk dinte të bënte punë të tjera, mua më ka futur në politikë bindja se maja ku duhet të ngjitet Shqipëria është e arritshme.
‘’Ndërsa ne nuk e duam për pushtetin, por e duam që pushteti të jetë për Shqipërinë. Po ju thosha disa të rinjve sot në Gramsh, mua nga emigracioni nuk më ka sjellë ndonjë nevojë që të gjej një punë si ministër, nuk më ka futur në politikë halli se nuk dija të bëja punë të tjera. Politika nuk ishte pasioni im i parë, por në politikë më futi bindja se maja ku Shqipëria duhet të ngjitet është e arritshme.
Na duhet punë e jashtëzakonshme. Është shumë e thjeshtë, nëse do të bësh dallimin. Ata kanë dalë nëpër Shqipëri, thonë që para 8 vitesh ndodhi aksident, dmth populli lajthit e hoqi ata. |Tani duan të korrigjojnë gabimin.”, tha kryeministri i vendit Edi Rama.
