Pas përplasjes së parë mes protestuesëve dhe policisë mesditën e sotme gjatë protestës së opozitës që kërkon të rrëzojë qeverinë, u mendua se situata u qetësua.
Por vetëm pak më parë, protesta u tensionua sërish pasi disa protestues me vare në dorë, kanë tentuar të thyejnë dyert e kryeministrisë për të hyrë në brendësi të godinës.
Në imazhet e trasmetuara nga televizionet në vend shihet sesi protestuesit godasin me forcë dyert, por janë sprapsur nga punonjësit e gardës të cilët nga brendësia e kryeministrisë, kanë lëshuar ujë dhe gaz lotsjellës.
Gjithashtu, snajperët e vendosur në tarracën e godinës kanë spraprsur protestuesit nga shkallët duke i goditur me plumba gome.
Mësohet se gjatë protestës janë plagosur 6 persona, mes tyre 2 policë të goditur me sende të forta.
Mes trazirave, bëhet e ditur se është shkatërruar edhe skulptura e kërpudhës që qëndron prej disa vitesh në oborrin e kryeministrisë.
