Fluturimet në Aeroportin e Rinasit u pezulluan për shkak të grevës së më shumë se 60 kontrollorëve të cilët kërkonin rikthimin në punë të kolegëve të pushuar padrejtësisht dhe rikthimin e pagës së plotë sipas kontratës kolektive. Sipas një dokumenti të publikuar, mësohet se kontrollorët e Aeroportit të pushuar nga puna kishin kërkuar një periudhë pushimi tre ose katër ditore për shkak të mungesës së gjumit dhe përqendrimit dhe stresit të akumuluar për shkak të situatës financiare.
“Duke u bazuar në kapitullin e paaftësisë për punë, kërkojmë një periudhë tre ose katër ditor rikuperimi. Arsyet janë: Mungesë gjumi dhe përqendrimi; Stres i akumuluar për shkak të situatës financiare dhe COVID-19; Mos mbulim i paketës shëndetësore as nga sigurimet shoqërore as nga kompania e Spitalit Amerikan”, shkruhet në document.
Ndërkohë kontrollorët Flora Ndreca, Muhin Mezini, Nelton Shabani, Gentian Hodo dhe Edvin Bakiri u pushuan nga puna pasi u deklaruan të paaftë. Kolegët e tyre kanë vazhduar grevën ditën e sotme duke i ardhur në mbështetje dhe kanë bërë të ditura edhe kërkesat e tyre që janë:
Rikthim i kolegëve në punë
Shfuqizim i vendimeve të bordit
Rikthimi i pagës së plotë sipas kontratës kolektive
Transparencë financiare e plotë për vitin 2020
Një anëtar sindikate të jetë anëtarë bordi
Ministrja e Infrastrukturës, Belinda Balluku e cilësoi grevën si një “grusht shteti. Nga ana tjetër kryeministri Rama kërcënoi me burg kontrollorët që kishin hyrë në grevë dhe akuzoi Sali Berishën dhe opozitën për organizimin e “sabotimit të rëndë”.
