Numri dy i Partisë Socialiste, njëherësh edhe drejtuesi politik për Qarkun e Elbasanit, Taulant Balla në një nga takimet e tij elektorale, iu kujton të rinjve se nuk duhet të hezitojnë për të votuar më 25 prill. Gjithashtu ai është shprehur se nuk është as si Basha dhe as si Kryemadhi.
“Për të rinjtë, Partia Socialiste do të bëjë më shumë. Unë e di se shumë të rinj janë hezitues për të dhënë votën sepse mendojnë se janë të gjithë njëlloj. Por unë dua të ju tregoj se un s‘jam njëlloj me Monika Kryemadhin, nuk jam njëlloj as me Lulzim Bashën. Asnjëri nga ne nuk është njëlloj me ato”, tha ai.
Më tej Balla shtoi se në Shqipëri nuk ka asnjë ofertë më të mirë se sa kjo që ofron Partia Socialiste. Ndër të tjera ai ka prekur edhe fjalën e kryedemokratit nga Krasta ku u shpreh se do të ndërtonin një kampus universitar në Elbasan.
“Në Shqipëri nuk ka asnjë ofertë më të mirë se sa kjo që kemi ne sepse ofertën e bën ekipi, lidershipi dhe programi. Ne nuk mund ta lëmë në mes paktin për universitetin. E dëgjuat Lulzimin në Krastë ku tha se do të ndërtojë një kampus universitar në Elbasan, të njëjtën gënjeshtër ka thënë fiks në të njëjtin vend në 2009. Ne jemi në proces e sipër të ndërtimit të një godine të re aty ku është”, u shpreh Balla.
Në përfundim të fjalës së tij Balla i ftoi të rinjtë për të votuar Partinë Socialiste për një të ardhme më të mirë për Shqipërinë.
“Mendon ndonjë e re apo i ri i Elbasanit që e gjen veten tek Gaz Bardhi apo Monika Kryemadhi? Nëse është kështu atëherë kemi problem shumë të madh me vizionin për të ardhmen. Në fund të fletës së votimit është numri 12, mos u lodhni fare të shikoni numrat e tjerë” e mbylli fjalën e tij ai.
