Studentët e disa prej fakulteteve në Tiranë, siç kishin paralajmëruar, kanë nisur edhe sot protestën që në orën 9:00 kundër vendimit të qeverisë, që i detyron ata të paguajnë për provimet e mbartura.
Studentë nga universiteti i Mjekësisë, universiteti Bujqesor dhe disa fakultete nga universiteti i Tiranes janë grumbulluar sot pranë godinave ku ata bëjnë mësim dhe kanë marshuar drejt Ministrisë së Arsimit duke bërë thirrjet e tyre për kërkesat që i kanë drejtuar ministres Lindita Nikolla mbëmë me anë të një letre nga Këshilli Studentor i Fakulteteve.
Përvec anulimit të VKM që i detyron të paguajnë 670 lekë për kredit për çdo provim të mbartur, studentët kanë edhe 3 kërkesa të tjera.
Kërkesat e studentëve janë 4 :
1. Anulimi i VKM për tarifat shtesë.
2. Përgjysmimi i tarifës së studimit.
3. Përmirësimi i kushteve të konvikteve.
4. Bordi i Administrimit të ketë numër të barabartë votash mes fakulteteve dhe Ministrisë së Arsimit, duke shtuar një përfaqësues nga studentët në bord.
Ata i kanë lënë afat Ministrisë së Arsimit deri në orën 16:00 të ditës së sotme që të kthejë përgjigje për kërkesat e tyre.
Një nga studentët u shpreh se vendimi për tarifat është i padrejtë dhe diskriminues dhe nëse nuk merren vesh me mirëkuptim, protesta e tyre nuk do ndalet madje ato do kalojnë në demonstratë. “Kjo është një protestë studentore dhe nuk është politikë. Politikën nuk e bëjmë ne.”- tha ai.
Jo vetëm në Tiranë, por edhe në qytete të tjera si Elbasani e Durrësi është bojkotuar mësimi dhe të gjithë studentët kanë dalë në rrugë duke protestuar.
