Shqipëria ka siguruar 50 mijë doza të tjera të vaksinës Astrazeneca. Lajmin e ka bërë të ditur kryeministri Rama i cili ka thënë se vaksinat janë prodhuar nga një institut i Indisë. Në emisionin “Kjo Javë” Rama ka deklaruar se janë drejt përfundimit negociatat me BE për të siguruar një sasi prej 100 mijë dozash.
“Ne kemi arritur të sigurojmë sërish rreth 22 mijë doza Pfizer në prill dhe më duket se janë të ndara në tre transhe çdo javë. Jemi duke përfunduar një negociatë me BE që më në fund falë angazhimit të presidentes së komisionit dhe komisionerit Varhelyi ka siguruar një sasi prej 600-651 mijë dhe aty ne po punojmë për kontratën, duhet të jetë lidhur dhe do të nisë edhe aty një sasi që do të ndahet në mënyrë të barabartë, besoj do kemi edhe aty rreth 100 mijë. Ndërkohë kemi marrë nga një institut i Indisë që prodhon Astrazeneca, për 50 mijë, këtë po e merrni ju si lajm ekskluziv dhe kjo është lufta nga Amerika në Turqi, nga Emiratet në Indi”, tha Rama.
Kryeministri ka folur edhe për planin e vaksinimit të cilin e ka cilësuar shumë të qartë. Ai ka thënë se tashmë vaksinimi po bëhet në mënyrë të kombinuar dhe paralelisht po marrin dozat të moshuarit, gazetarët e kategoritë e tjera, pasi janë mundësitë.
“Plani është shumë i qartë, ne kemi hyrë në fazën e planit të kombinuar sepse kemi mundësi ta bëjmë këtë gjë dhe paralelisht për të moshuarit, për të cilët praktikisht kemi siguruar dozat ne tani po përpiqemi që të vazhdojmë, edhe pjesa e gazetarëve të terrenit, apo e atyre që janë në studio e kanë kontakt me të tjerë, është pjesë e planit dhe kështu që plani është i qartë, rëndësi ka të kesh dozat. Dhe ky është stresi im i përditshëm, që kur ka dal vaksina më është bërë jeta .. sa hap sytë ku do i gjej dozat e tjera dhe kur mbyll sytë ku jemi me dozat e tjera. Komunikimet e mia me Ogertën Benin janë frenetike sepse janë pjesë e këtij trekëndëshi, jemi në kontakte me palë të tjera, diku ecën, diku shkon më shpejt diku më avash”, deklaroi Rama.
